HISTORY

കാസറഗോഡ് ജില്ലയില്‍ സര്‍ക്കാര്‍ വിദ്യാലയങ്ങളുടെ കൂട്ടത്തില്‍ ശ്രദ്ധേയമായ സ്ഥാനമാണ് പാക്കം ഗവണ്‍മെന്റ് ഹയര്‍ സെക്കന്ററി സ്കൂളിനുള്ളത്. ഇക്കേരി നായക്കന്മാരും മൈസൂര്‍ സുല്‍ത്താന്മാരും ചരിത്രമെഴുതിയ കാസറഗോഡിന്റെ ഗതകാല പ്രൗഡിയുടെ പ്രതീകമായി ഉയര്‍ന്ന് നില്‍ക്കുന്ന ബേക്കല്‍ കോട്ടയില്‍ നിന്നും വിളിപ്പാടകലെ പ്രകൃതി രമണീയമായ പാക്കത്ത് 1957 ലാണ് ഏകാധ്യാപകവിദ്യാലയമായി ഈ സരസ്വതിക്ഷേത്രം ജന്മം കൊണ്ടത്. ബ്രിട്ടീഷുകാരുടെ കാലത്ത് മദിരാശി സംസ്ഥാനത്തിന്റെ ഭാഗമായിരുന്ന ദക്ഷിണ കാനറ ജില്ലയിലെ ബേക്കല്‍ താലൂക്കില്‍പ്പെട്ട പാക്കത്ത് പ്രാഥമികവിദ്യാഭ്യാസത്തിനുള്ള സൗകര്യം പോലും ഇല്ലാതിരുന്ന ഇക്കാലത്ത് ഇത് അക്ഷരാര്‍ത്ഥ്തതില്‍ ഇതൊരനുഗ്രഹമായി.

പ്രമാണിയായ ഒരു സ്വകാര്യ വ്യക്തി സൗജന്യമായി നല്‍കിയ ഒരു കെട്ടിടത്തിലാണ് ഇത് ആദ്യകാലത്ത് പ്രവര്‍ത്തിച്ചിരുന്നത്. 1 മുതല്‍ 4 വരെ ക്ലാസ്സുകള്‍ മാത്രമേ അന്ന് ഇവിടെ പ്രവര്‍ത്തിച്ചിരുന്നുള്ളൂ. പനയാല്‍ സര്‍വ്വീസ് സഹകരണ ബാങ്കിന്റെ പാക്കം ശാഖ ഇന്ന് പ്രവര്‍ത്തിക്കുന്ന കെട്ടിടത്തിന് നേരെ എതിര്‍ഭാഗത്ത് സ്ഥിതി ചെയ്യുന്ന സ്ഥലത്താണ് ഇതിന്റെ ആദ്യകാല കെട്ടിടം നിലനിന്നിരുന്നത്. പിന്നീട് പാക്കം കണ്ണംവയല്‍ അമ്പലത്തിങ്കാല്‍ ശ്രീ വൈകുണ്ഠഗിരി ക്ഷേത്രം ഇന്ന സ്ഥിതി ചെയ്യുന്നതിന്റെ തൊട്ട് പടിഞ്ഞാറ് ഭാഗത്തേക്ക് ഈ വിദ്യാലയത്തെ മാറ്റുകകയും ദീര്‍ഘകാലം അവിടെ തന്നെ പ്രവര്‍ത്തിക്കുകയും ചെയ്തു. പിന്നീട് 1967 ല്‍ ഇതിന് സ്വന്തമായി സര്‍ക്കാര്‍തലത്തില്‍ കെട്ടിടം നിര്‍മ്മിക്കുകയും ഇന്ന് സ്കൂള്‍ സമുച്ഛയം സ്ഥിതി ചെയ്യുന്നിടത്തേക്ക് മാറുകയും ചെയ്തു. ഒപ്പം തന്നെ യു പി സ്കൂളായി ഇതിനെ ഉയര്‍ത്തുകയും ചെയ്തു. 1990 ല്‍ ഈ വിദ്യാലയം ഹൈസ്കൂളായും 2010 ല്‍ ഹയര്‍ സെക്കന്ററിയായും ഈ വിദ്യാലയം ഉയര്‍ത്തപ്പെട്ടു. കേരള രാഷ്ട്രീയത്തിലെ അതികായകാരായ മുന്‍മുഖ്യമന്ത്രി ശ്രീ ഇ കെ നായനാരും, മുന്‍ മന്ത്രിമാരായ ശ്രീ എന്‍ കെ ബാലകൃഷ്ണനും, ശ്രീ കെ ചന്ദ്രശേഖരനും ഈ പ്രദേശത്തുകാരുടെ പ്രിയപ്പെട്ട കുഞ്ഞിരാമേട്ടനും ഈ സ്കൂളിന്റെ ഉയര്‍ച്ചയില്‍ നിര്‍ണ്ണായക പങ്ക് വഹിച്ചിട്ടുണ്ട്.

പാഠ്യ പാഠ്യേതരവിഷയങ്ങളില്‍ സംസ്ഥാന അംഗീകാരം ലഭിക്കാന്‍ വരെ ഈ വിദ്യാലയത്തിന് സാധിച്ചിട്ടുണ്ട്. 800 ല്‍ പ്പരം കുട്ടികള്‍ ഹൈസ്കൂള്‍ വരെയും 250 കുട്ടികള്‍ ഹയര്‍ സെക്കന്ററിയിലുമായി പഠനം നടത്തുന്നു. കൂട്ടക്കനി, ചെറക്കാപ്പാറ, പള്ളിക്കര എന്നിവിടങ്ങളിലുള്ള എല്‍ പി, യു പി വിദ്യാലയങ്ങളാണ് ഈ സ്കൂളിന്റെ ഫീഡര്‍ സ്കൂളുകള്‍. പരിചയസമ്പന്നരും പ്രശസ്തരുമായ അനേകം പ്രധാനാധ്യാപകരും, അധ്യാപകരും തങ്ങളുടെ തൊഴില്‍ വൈദഗ്ധ്യം സ്കൂളിനായി സമര്‍പ്പിച്ചതിന്റെ ഫലമായി ഭൗതികവും ബൗദ്ധികവുമായ നിരവധി നേട്ടങ്ങള്‍ക്ക് വേദിയാകാന്‍ ഇതിന് സാധിച്ചിട്ടുണ്ട്. വിവിധ മേഖലകളില്‍ പ്രശസ്തരായ പല വ്യക്തികളുടേയും ബാല്യകാല വിദ്യാഭ്യാസത്തിന് സാഹചര്യമൊരുക്കാന്‍ സാധിച്ചുവെന്ന ചാരിതാര്‍ത്ഥ്യത്തോടെ തലയുയര്‍ത്തി നില്‍ക്കുകയാണ് ഈ സരസ്വതി ക്ഷേത്രം. ഉത്തരോത്തരം പുരോഗതി തുടര്‍ന്നും ഇതിന് സാധിതമാകട്ടെ എന്ന് പ്രാര്‍ത്ഥിക്കാം.